विराटनगर— आफूलाई प्रहरी बताउँदै लुटपाटमा संलग्न दुई जनालाई प्रहरीले पक्राउ गरेको छ ।
विराटनगर महानगरपालिका–१ पानीट्यांकीका ३८ वर्षीय दीपक तामाङ र विराटनगर ४ का ३६ वर्षीय सुनिल थापालाई प्रहरीले पक्राउ गरेको हो ।
उनीहरुले दुई दिनअघि विराटनगर १२ रानीका रविकुमार साह सुडीबाट लाखौं रकम लुटेको प्रहरीले जनाएको छ ।
मोरङ प्रहरीका प्रवक्ता डीएसपी रन्जनकुमार दाहालका अनुसार प्रहरी हौं भन्दै धम्क्याएर उनीहरुले लुटपाट गरेको पाइएको छ ।
लुटिएका पीडित साहले बिमाका लागि तिर्न र बैंकमा जम्मा गर्न लैजाँदै गरेको १२ लाख रूपैयाँ लुटिएको प्रहरीमा बताएका छन् ।
प्रहरीले पक्राउ परेकाहरुको साथबाट लुटिएको रकम पनि बरामद गरेको जनाएको छ ।
घटनाबारे थप अनुसन्धान भइरहेको प्रहरीले जनाएको छ । लुटपाटमा संलग्न तामाङ र थापा दुवै जागिर छाडेका (पूर्वप्रहरी) रहेको प्रारम्भिक अनुसन्धानबाट खुलेको डीएसपी दाहाले जानकारी दिए ।
