काठमाडौं— बाँकेको नेपालगञ्जस्थित सुर्खेत रोडमा चेतन मानन्धरलाई खुँडा हानेर हत्या गर्ने मुख्य नाइके रिगल उर्फ योगराज ढकाललाई आममाफी दिने निर्णयविरुद्ध सर्वोच्च अदालतमा परेको रिटको पेसी न्यायाधीश डा.मनोजकुमार शर्माको इजलासमा तोकिएको छ ।

चेतन मानन्धरकी श्रीमती भारतीले असोज १४ गते रिट दायर गरेकी थिइन् । सर्वस्वसहित जन्मकैद भएका रिगललाई गत संविधान दिवसका अवसरमा आम माफी दिइएको थियो ।

उक्त निर्णयविरुद्ध भारती न्याय खोज्दै काठमाडौंमा आइपुगेकी छिन् । भारती बुधबार सर्वोच्च परिसरमा ढलेकी थिइन् । उनलाई वीर अस्पतालमा उपचार गरिएको छ । उनी गुण्डा रिगललाई जेल पठाउनु माग गर्दै अनशन बसेकी छिन् ।