काठमाडौं— नेपाल प्रहरीको पेट्रोल पम्पमा एक करोड बढी घोटाला गरेको आरोप लागेका सहायक निरीक्षक (असई) दिलिप कार्की दोषी ठहर भएका छन् ।
विशेष अदालतका सदस्यत्रय न्यायाधीश यमुना भट्टराई, शालिग्राम कोइराला र बलभद्र बास्तोलाको संयुक्त इजलासले कार्कीलाई सोमबार दोषी ठहर गरेको हो ।
प्रहरी कल्याण कोष पेट्रोल पम्प नक्सालमा कार्यरत रहँदा आर्थिक वर्ष २०७४/०७५ र २०७५/७६ मा कार्कीले एक करोड ८ लाख ९९ हजार एक सय ८४ रुपैयाँ घोटाला गरेको आरोप लागेको थियो ।
अख्तियार दुरुपयोग अनुसन्धान आयोगले असई कार्कीलाई २०७७ साउन ३० मा नियन्त्रणमा लिएको थियो । पम्पमा कार्यरत रहँदा असई कार्कीले एक करोड आठ लाख ९९ हजार एक सय ८४ रुपैयाँ हिनामिना गरेको देखिएपछि प्रहरी मुख्यालयले अख्तियारमा पत्र पठाएको थियो । सोही पत्रको आधारमा अख्तियारले असई कार्कीलाई पक्राउ गरेको थियो । उनीविरुद्ध आयोगले २०७८ साउन ३१ मा विशेष अदालतमा आरोपपत्र दायर गरेको थियो ।
