काठमाडौं— बेला बेला झ्याप्पझ्याप्प हुने ‘अघोषित लोडसेडिङ’ ले काठमाडौं उपत्यकावासी हैरान छन् ।
यही बेला नेपाली राष्ट्रिय क्रिकेट टिमले सोमबार एसिया कपको आफ्नो दोस्रो खेलमा भारतविरुद्ध खेल्दै छ । श्रीलङ्कामा हुने यो खेल नेपाली समयानुसार दिउँसो ३ः१५ बजे सुरु हुनेछ । अधिकांश नेपाली यो खेलको प्रतीक्षामा छन् । तर, झ्याप्पझ्याप्प बत्ती जाने हो कि भन्ने चिन्ता खेलप्रेमीलाई छ ।
नेपाल विद्युत् प्राधिकरणका प्रवक्ता सुरेशबहादुर भट्टराई खेल भइरहदा कही कतै पनि बत्ती नजाने बताउँछन् । तर, अपरझट रूपमा रुखले तार छोयो वा ट्रान्समिटर पड्किएमा केही भन्न नसकिने उनी बताउँछन् ।
‘लोडसेडिङ काहीँ पनि छैन । कहिले काहीँ इमर्जेन्सी आगो लाग्यो भने अथवा रुखले तार छोयो भने लाइन अवरूद्ध हुने हो,’ उनले भने, ‘हावा, हुरीबतास कतै चल्यो भने केही भन्न सकिँदैन । आज काहीँ अवरूद्ध हुँदैन ।’
तर, प्राधिकरणले भने सोमबार ११ बजेदेखि बेलुका ६ बजेसम्म थिमि प्रसारण केन्द्रको बालकुमारी फिडरअन्तर्गत पर्ने सिरुटार डोलबाट सेक्सन लाइजर र ब्लेट स्विच काटिने बताइएको छ । ११ किलोभोल्ट लाइनमा परेको रूखका हाँगाहरू, बाँस कटान कार्यको लागि आज उक्त लाइन सटडाउनमा राखी कार्य गर्नुपर्ने बताएको छ ।
यो लाइनअन्तर्गत पर्ने सिरुटार, बिरुवा, तर्खाल,सिकारिटार, कालिटार, दधिकोट क्षेत्रमा लाइन अवरूद्ध हुने जानकारी दिइएको छ ।
त्यस्तै, जोरपाटी प्रसारण केन्द्रको गोठाटार फिडरअन्तर्गत पर्ने मान्टार, डोटेल डेरी वडा नं ९ कार्यालय, हात्तीडाँडा,ओपिटार, गोठाटार हेल्थपोस्ट,पहेँलोपुल क्षेत्रमा विद्युत् अवरूद्ध हुनेछ । ११ केलोभोल्ट ‘कन्डक्टर अपग्रेटिङ’ कार्यका लागि १० बजेदेखि बेलुका ५ बजेसम्म उक्त फिडर सटडाउनमा राखी कार्य गरिने छ ।
तर, यो कार्य निर्धारित समयअगावै सम्पन्न भएमा लाइन सुचारू हुन सक्ने छ ।
