बाग्लुङमा हावाहुरीले मकै बालीमा क्षति पुर्यायो
बाग्लुङ— हावाहुरी र वर्षाले बाग्लुङका विभिन्न स्थानमा मकै बालीमा क्षति पुर्याएको छ । घोँगा लाग्ने बेलामा आएको हावाहुरीले जिल्लाको तमानखोलाका किसानले सयौँ रोपनी क्षेत्रफलमा लगाएको मकै बालीमा क्षति पुर्याएको हो ।
वडा नम्बर १ र २ को सेन्नामा, पहिरा, बोङ्गानी, सोम्मरलगायतका गाउँको करिब ७ सय रोपनी क्षेत्रफलमा लगाएको मकै पूर्ण रुपमा नष्ट भएको तमानखोला गाउँपालिकाका कृषि शाखा प्रमुख सन्देश पराजुलीले जानकारी दिए ।
शनिबार राति र आइतबार बिहान आएको हुरीले मकै बालीमा क्षति गरेको उनको भनाइ छ ।
७ सय रोपनीमा लगाएको मकै कामै नलाग्ने गरी ढलेपछि किसानले ५० लाखभन्दा बढीको क्षति बेहोर्नुपरेको उनले बताए ।
किसानले हावाहुरीले मकै नष्ट गरेको जानकारी गाउँपालिकालाई गराइसकेका छन् ।
प्रकाशित मिति: सोमबार, भदौ १८, २०८० ०८:१२
थप समाचार
