काठमाडौं— नेपाली कांग्रेसका सांसद शशांक कोइरालाले आगामी राजनीति युवाहरूको पक्षमा हुनु पर्ने बताएका छन् ।
मंगलबार प्रतिनिधि सभा बैठकबाट बाहिरिने क्रममा पत्रकारसँग कुराकानी गर्दै सांसद कोइरालाले आगामी राजनीति युवाहरूको पक्षमा ल्याउनु पर्ने बताएका हुन् ।
उनले आफूहरू बुढो भइसकेको र कहिले ढल्ने थाहा नभएको बताउँदै राजनीतिमा युवाको आवश्यकता औँल्याएका हुन् । उनले यसका लागि आफू मनसुन सकिएसँगै पन्ध्रौँ महाधिवेशनको तयारी स्वरुप सबे प्रदेशमा घुम्ने बताए ।
‘पन्ध्रौँ महाधिवेशन तयारीको सिलसिलामा सातै प्रदेशमा घुम्ने, किनभने भोलिको राजनीति भनेको युवाहरूको पक्षमा ल्याउनु पर्छ, हामी त बुढो भइसक्यौँ कहिले ढल्छौँ थाहा छैन,’ उनले भने ।
यसैबीच सांसद कोइरालाले सभापतिको उम्मेदवार बन्नेबारे साथीहरूसँग कुरा गरेर मात्रै निर्णय गर्ने बताए । ‘म सबभन्दा पहिले साथीहरूसँग कुरा गर्छु, उनीहरूको चाहना के हो ? मैले मात्रै चाहेर त भएन नि, उनीहरूको चाहना हेर्छु, अनि त्यसपछि निर्णय गर्छु,’ उनले थपे ।
यसैगरी, सरकारलाई स्थायित्व दिनका लागि गठबन्धन गरेको बताउँदै जनता खुसी हुन नसकेको उनको भनाइ थियो ।
