काठमाडौं— शहिद स्मारक ए डिभिजन लिग फुटबलको छैटौं चरणका खेलहरू सोमबारबाट सुरु हुँदैछ ।

लिगको छैटौं चरणअन्तर्गत सोमबार दुई खेलहरू हुँदैछ । च्यासल मैदानमा दुई विभागीय टोली एपीएफ क्लब र नेपाल पुलिस क्लब भिड्दैछन् । विभागीय डर्बी भिडन्त दिउँसो २ बजे सुरु हुनेछ ।

एपीएफ ७ अंक जोडेर छैटौं स्थानमा रहेको छ । पाँचौं चरणसम्म जितविहीन पुलिस पहिलो ३ अंकको योजनामा रहेको छ । पुलिस १ अंक जोडेर पुछारमा रहेको छ ।

यस्तै एन्फा कम्प्लेक्समा संकटा क्लब र एफसी खुमलटार भिड्दैछन् । संकटा र खुमलटारबीचको खेल दिउँसो २ बजे सुरु हुनेछ ।

संकटा ५ खेलमा ६ अंक जोडेर आठौं स्थानमा छ । खुमलटार तेस्रो जितको खोजीमा हुनेछ । खुमलटार ६ अंक जोडेर नवौं स्थानमा छ ।