काठमाडौं— ६० किलो सुन बरामद प्रकरणको अनुसन्धानका लागि प्रहरीको केन्द्रीय अनुसन्धान ब्युरो (सीआईबी) ले अन्तर्राष्ट्रिय अपराध प्रहरी संगठन (इन्टरपोल)को सहयोग मागेको छ ।
सीआईबीले इन्टरपोल बेइजिङ मार्फत हङकङ सब ब्युरो र भारतको नेशनल सेन्ट्रल ब्युरो (दिल्ली)लाई सहयोग माग्दै पत्राचार गरेको हो । त्रिभुवन अन्तर्राष्ट्रिय विमानस्थल भन्सार कार्यालयबाट जाँच पास भएर बाहिरिएको कार्गो सामानबाट गत साउन ३ मा सुन बरामद भएको थियो ।
उक्त सामान हङकङबाट आएको थियो । स्रोतका अनुसार त्यसैले सुन पठाउने व्यक्तिहरू र त्यहाँको थप नेक्ससबारे सूचना सीआईबीले हङकङस्थित इन्टरपोलका अधिकारीहरूसँग मागेको हो ।
साथै नेपालमा बरामद सुनको गन्तव्य भारत भएकाले पनि त्यहाँका अधिकारीहरूसँग पनि सहयोग मागिएको स्रोतको दाबी छ । साथै, नेपालमा सुनसहित पक्राउ परेका चिनियाँ नागरिकहरू यसअघि भारतमा पनि पक्राउ परेको सूचना प्रहरीले पाएको छ । सुन तस्करी प्रकरणमा हालसम्म २३ जना पक्राउ परेका छन् ।
