रौतहट— सडक दुर्घटनामा एक महिलाको मृत्यु भएको घटनामा बिहीबार दिउँसोदेखि रौतहटको पूर्व–पश्चिम राजमार्ग बागमती–चपुर सडक खण्ड अवरुद्ध भएको छ ।
चन्द्रपुर नगरपालिका–१ स्थित बागमती क्षेत्रमा ट्रकको ठक्करबाट स्थानीय करिब ५५ वर्षीया विमलाकुमारी विमलीको मृत्यु भएपछि आक्रोशित स्थानीयले उक्त ट्रकमा आगजनी गर्नाका साथै राजमार्ग अवरुद्ध गरेका हुन् ।
पश्चिम दिशाबाट पूर्वतर्फ जाँदै गरेको ना ६ ख १५०० नं को मालबाहक ट्रकले ठक्कर दिँदा उनी सख्त घाइते भएपछि चालकले जानीजानी गाडी ब्याक गरेर मारेको आरोप लगाउँदै उनीहरूले ट्रकमा आगजनी गरेको बताइएको छ ।
उक्त ट्रकका चालक फरार भएका र सहचालकलाई नियन्त्रणमा लिइएको इलाका प्रहरी कार्यालयले जनाएको छ । आगजनी भएको ट्रकको आगो निभाउन गएको नगरपालिकाको दमकललाई आक्रोशित स्थानीयले तोडफोड गरी क्षति पुर्याएको बताइएको छ ।
दमकलमा ढुंगा प्रहार गर्दा ना १ झ ६८८ नं को उक्त दमकलको अगाडिको शिशा पूर्ण रूपले फुटेको र चालक कुमार बस्नेत सामान्य घाइते भएका छन् ।
चालक बस्नेतले आफ्नो आँखामा शिशाको टुक्राले चोट पुर्याएको बताएका छन् ।
