काठमाडौं— नेकपा (एमाले) का अध्यक्ष केपी शर्मा ओलीले माधव नेपाल नेतृत्वको नेकपा एकीकृत समाजवादी पार्टीलाई लक्षित गर्दै ‘एमाले विरोधी हुँ’ भन्नेहरू नेता तथा सांसद वर्तमान सरकारमा मन्त्री भएको टिप्पणी गरेका छन् ।
एमालेको पक्षमा छैनौं भन्नेहरूलाई प्रधानमन्त्री पुष्पकमल दाहाल ‘प्रचण्ड’ ले मन्त्री बनाएको ओलीको दाबी छ । उनले सत्तारुढ दल दशतिर फर्केकाले उनीहरूबाट देश बन्नै नसक्ने पनि बताए ।
‘भवितव्यमा दुई वटा सिट आयो । एमालेकाविरुद्ध बोले । मन्त्री भए । जान्नुतान्नु केही पनि पर्दैन । एमालेको पक्षमा म छैन । एमाले विरोधी हुँ भनेपछि मन्त्री बन्न क्वालिफिकेशन पुग्छ,’ ओलीले भने ।
आइतबार काठमाडौंमा आयोजित पार्टी निकट लोकतान्त्रिक आदिवासी जनजाति महासंघको राष्ट्रिय महाधिवेशनको उद्घाटन गर्दै अध्यक्ष ओलीले देश बनाउनका लागि एउटै नीति, विचार, संगठनले नेतृत्व गर्नुपर्ने तर्क गरे ।
अध्यक्ष ओलीले एमालेलाई राष्ट्रिय शक्ति बन्न नदिएर देशलाई दक्षिणपन्थी शक्तिले छिन्नभिन्न बनाउने प्रयास गरिरहेको पनि बताए ।
