काठमाडौं— नेकपा एमालेका उपमहासचिव पृथ्वीसुब्बा गुरुङले संघीयतामाथि खुलमखुल्ला हमला भइरहेको बताएका छन् ।
आइतबार लोकतान्त्रिक आदिवासी जनजाति महासंघको राष्ट्रिय महाधिवेशनलाई सम्बोधन गर्दै उनले संघीयतामाथि हमला भएको बताएका हुन् ।
उनले नेकपा एमालेले भनेको आधारमा नै सात वटा प्रान्तमा आधारित मुलुकमा संघीय शासन संरचना बनेको बताए ।
उनले संघीयता कार्यान्वयन गर्न फेरि आनाकानी भइरहेको बताए । संघीयता विरोधीले संघीयताविरुद्धमा नारा लगाइरहेको भन्दै उनले यसको यथोचित जवाफ दिन सक्नुपर्ने बताए ।
उनले भने, ‘सात वटा प्रदेशमाथि नै हमला भइरहेको छ । संघीयताविरोधीहरूले नारा लगाइरहेका छन् । खुलमखुला भनिरहेको छ, राजा फर्काइन्छ, हिन्दुराज्य स्थापना गरिन्छ । यो सहन सकिन्न । यसको हामीले यथोचित् जवाफ दिन सक्नुपर्छ ।’
संघीयतामाथि प्रश्न उठाउने र प्रदेशको अधिकार खोस्नेकुरा सह्य नहुने गुरुङले चेतावनी दिए ।
