काठमाडौं— नेपाल शिक्षक महासंघले सुरु गरेको आन्दोलनअन्तर्गत शुक्रबार सामुदायिक विद्यालयमा कार्यरत शिक्षक कर्मचारीले आफ्नो निर्वाचन क्षेत्रबाट निर्वाचित प्रदेश तथा प्रतिनिधि सभा सांसदलाई मागबारे ध्यानाकर्षण गराएका छन् ।

उनीहरूले भेट्न सम्भव भएका सांसदलाई ज्ञापनपत्र बुझाए भने भेट्न असम्भव भएकाहरूलाई इमेलमार्फत ज्ञापनपत्र पठाए ।

विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयकप्रति असहमति जनाउँदै शिक्षक महासंघले चरणबद्ध आन्दोलन गर्दै आएको छ ।

उक्त विधेयक गत साउन १६ गते मंगलबार मन्त्रिपरिषद् बैठकले संघीय संसदमा प्रस्तुत गर्ने निर्णय गरेको थियो ।

विधेयकप्रति शैक्षिक संघसंगठनले असहमति जनाउँदै आएका छन् ।