काठमाडौं— अमेरिकी पूर्वराष्ट्रपति डोनाल्ड ट्रम्पले सन् २०२० को चुनावलाई उल्टाउने षड्यन्त्र गरेको मुद्दाको सुनुवाइ गर्ने समितिको अध्यक्षता गरिरहेकी न्यायाधीशलाई हत्याको धम्की दिएकी टेक्सासकी एक महिला पक्राउ परेकी छन् ।
अगस्ट ५ मा अबिगेल जो श्रीले संघीय न्यायाधीश तान्या चुटकनको वासिङ्टन कार्यालयमा उनलाई हत्या गर्ने फोन सन्देश छोडेको अभियोगमा सुरक्षा निकायले उनलाई पक्राउ गरेको हो ।
‘डिपार्टमेन्ट अफ होमल्याण्ड सेक्युरिटीको एजेन्ट’ले दायर गरेको उजुरीका आधारमा उनलाई पक्राउ गरिएको हो ।
टेक्सासको एल्विनकी ४३ वर्षीया जो श्रीले अश्वेत न्यायाधीश चुटकनलाई ‘मुर्ख काली ! तिमी दास हौँ तिमी हाम्रो निगरानीमा छौँ, हामी तिम्रो हत्या गर्न चाहन्छौँ,’ जातीय एवं रङ्गभेदयुक्त सन्देशमा भनेकी छन् ।
दक्षिणी टेक्सासको संघीय जिल्ला अदालतमा श्रीलेविरुद्ध दायर गरिएको मुद्दामा ‘यदि ट्रम्प २०२४ मा निर्वाचित भएनन् भने हामी तिमीलाई मार्ने छौँ, त्यसैले सावधान रहनू’, चुटकनको परिवार पनि आक्रमाणको निशाना रहेको सन्देशमा उल्लेख गरिएको जनाइएको छ ।
श्रीले टेक्सासकी अश्वेत सांसद शीला ज्याक्सन लीको नाम दिएर ट्रम्पलाई सताउने जो कोहीलाई मार्ने धम्की दिएकी छन् । उनलाई पक्राउ गरी अदालतमा पेश गर्न आदेश दिइएको छ ।
७७ वर्षीय ट्रम्प ०२४ को चुनावमा रिपब्लिकन पार्टीको अग्र पंक्तिमा छन् । यद्यपि, उनको ह्वाइट हाउसतर्फ दोस्रो यात्रा त्यति सहज छैन । किनभने उनले चारवटा आपराधिक मुद्दाको सामना गर्नु परेको छ ।
जमैकामा जन्मेकी न्यायाधीश चुटकनलाई पूर्वडेमोक्रेटिक राष्ट्रपति बराक ओबामाले नियुक्त गरेका हुन् । उनको नियुक्तिलाई सिनेटले सर्वसम्मतिले अनुमोदन गरेको थियो ।
