पोखरा— पशुमा महामारीका रुपमा फैलिएको लम्पी स्किन रोगले गण्डकी प्रदेशमा करिब ८० हजार पशुचौपाय प्रभावित भएको छ ।

यस रोगबाट २२ हजार ४९४ पशुचौपाया निको भएका छन् । लम्पी स्किनबाट प्रदेशमा चार हजार ५५४ पशुचौपाया मरेका छन् । 

गण्डकी प्रदेश कृषि तथा भूमि व्यवस्थामन्त्री महेन्द्रध्वज जोशीले प्रदेश सभा सदस्य भीमबहादुर कार्कीद्वारा दर्ता गरिएको लम्पी स्किन भाइरसविरुद्ध सार्वजनिक महत्वको प्रस्तावमाथिको छलफलमा उठेका प्रश्नको जवाफमा उक्त जानकारी दिएका हुन् ।

प्रदेशमा लम्पी स्किन रोगबाट पाँच दशमलव ६९ प्रतिशत चौपाया मरेको बताउँदै उनले यसको रोकथामका लागि तीनै तहका सरकार र व्यक्तिगत गरी कूल एक लाख १० हजार ४४९ पशुलाई खोप दिइएको जानकारी दिए ।

सबैभन्दा बढी गाई र गोरुमा संक्रमण देखिएको उल्लेख गर्दै मन्त्री जोशीले भने, ‘लम्पी स्किनबाट प्रदेशमा मर्नेमा ९५ प्रतिशत गाई गोरु र पाँच प्रतिशत भैँसी छन्, हिमाली भेगमा चौँरीमा समेत उक्त रोगको संक्रमण देखिएको छ ।’

गण्डकी प्रदेशको ८५ स्थानीय तहमध्ये ८२ वटा पालिकामा यो रोगको संक्रमण फैलिएको छ । उनले सीमित स्रोत साधन तथा जनशक्तिको अभावमा प्रदेश सरकार यस रोगप्रति संवेदनशील रहेको देखिएको स्पष्ट पारे ।

मुस्ताङको लोमान्थाङ, लो घेकर दामोदर कुण्ड र मनाङ जिल्लाको नापाभूमि गाउँपालिकामा भने लम्पी स्किन रोग देखिएको छैन ।

पशुमा उच्च ज्वरो आउने, घाँटी, पेट र पछाडिको भागमा गिर्खा, जोर्नी र खुरु सुनिने तथा निको भएपछि पनि बाजो पन देखिने यो रोगले दीर्घकालसम्म पनि कृषि क्षेत्रमा ठूलो क्षति हुने यो रोगको रोगथाम स्थानीय तहको महत्वपूर्ण भूमिका रहने बताउँदै उनले पशु बीमा दाबी भुक्तानीका लागि सम्बन्धित बीमा कम्पनीलाई निर्देशन दिएको जानकारी दिए ।

प्रदेश सभामा पहिलो पटक सार्वजनिक महत्वको प्रस्ताव दर्ता गराउँदै प्रदेश सभा सदस्य कार्कीले लम्पी स्किन रोगको कारण कृषकको जीवन स्तर कष्टकर बनेको बताए । उनले उचित राहत उपलब्ध गराएर प्रदेश सरकारप्रति जनताको आशा जगाउनु पर्नेमा जोड दिए ।

प्रदेश सभा सदस्य राजकुमारी भुजेल प्रस्तावक र विन्दु पौडेल समर्थक रहेको उक्त सार्वजनिक प्रस्तावमा रेखा गुरुङ, फणेन्द्र देवकोटा, डिल्लीराम सुवेदी, भक्तबहादुर कुवर, सरास्वती गुरुङ, कृष्णप्रसाद पाठक, कल्पना तिवारीलगायतले दुहुना गाई भैँसी र जोत्ने गोरु खाल्टोमा पुर्न बाध्य कृषकको घाउमा मलम लगाएर आशावादी बनाउन प्रदेश सरकारले तत्काल राहतका योजना ल्याउनु पर्नेमा जोड दिए ।