धनगढी— प्रतिनिधि सभा निर्वाचनमा नेपाली कांग्रेस सभापति शेरबहादुर देउवाका प्रतिस्पर्धी स्वतन्त्र उम्मेदवार सागर ढकालले आफू बसेको कोठा भाडा नतिरेको पाइएको छ । डडेल्धुरामा कोठा भाडा लिएका स्वतन्त्र उम्मेदवार सागर ढकालले आठ महिनादेखिको भाडा नतिरेको पाइएको हो ।
उनका घरधनी सीतादेवी भाटका अनुसार डडेल्धुराको अमरगढी नगरपालिका–५ मा कोठा भाडा लिएका ढकालले आठ महिनादेखिको भाडा नतिरेका हुन् । कोठामा ताला लगाएर ढकाल सम्पर्कविहीन रहेको उनको भनाइ छ ।
‘महिनाको तीन हजारका दरले भाडा हो । सुरुका तीन महिनाको भाडा नौ हजार दिनुभयो । असोज देखिको आठ महिनाको बाँकी छ,’ उनले भनिन्, ‘पटक–पटक फोन सम्पर्क गर्दा नउठाउने र आजभोलि मोबाइल नै अफ गरेर बस्नुभएको छ ।’
भाडा नतिरे प्रहरीकोमा निवेदन दिने तयारीमा रहेको भाटले बताइन् । सागरका भाइ जनक ढकालका अनुसार सागर ढकाल दुई महिनादेखि साउथ सुडानमा छन् ।
तर, यस विषयमा सागर ढकालसङ्ग कुरा गर्दा उनले कुनै प्रतिक्रिया दिएका छैनन् ।
गतवर्ष सम्पन्न प्रतिनिधि सभा निर्वाचनमा ढकाल पूर्वप्रधानमन्त्री तथा कांग्रेस सभापति देउवासँग पराजित भएका थिए । देउवाले २५ हजार ५३४ मत पाउँदा स्वतन्त्र उम्मेदवार ढकालले १३ हजार ४२ मत ल्याएका थिए ।
